Livet på Aasgårdvollen

Mariann og Grim Jardar driv ei levande seter med økologisk mjølkeproduksjon. Kvart år, midt i juni, flyttar dei saman med tre ungar, kalvar, ungdyr og kyr til fjells. Her bur dei i seterstua frå 1890-talet fram til byrjinga av september.

Kyrne beiter fritt i utmarka gjennom dagen, og kjem heim til kvelds når det er tid for mjølking – heilt i sitt eige tempo.

Tradisjonsmat og opplevingar

På Aasgårdsvollen blir det servert tradisjonell seterkost laga av mjølk frå eigne dyr. Rømme og skjørost blir foredla på setra, og måltidet blir supplert med smakebitar av lokalmat frå regionen og frå Eggen Gardsysteri. Vertskapet er medeigarar der og leverer setermjølk om sommaren.

Her får du oppleve reine smakar og ekte handverk – rett frå fjell til bord.

Du er velkomen til bords i storstua, der setermaten blir servert i triveleg lag. Samtidig får du innblikk i historia til setra, som har røter tilbake til slutten av 1800-talet og lange setertradisjonar.

Aasgårdsvollen ligg ved Østerdalsleden – pilgrimsleia som startar på Rena/Trysil og går via Tynset og Vingelen på veg mot Nidaros. 

Som gjest er det mogeleg å overnatte på setra og ta del i kvardagen, med fjøsstell og nærkontakt med kalvar, kyr, sau og geitekillingar.

Påmelding

Det blir Bondens bord-servering på Aasgårdvollen to datoar denne sommaren:

Lørdag 11. juli kl. 14.00 (påmelding innan 4. juli)

Fredag 24. juli kl. 14.00 (påmelding innan 18. juli)

Pris: Tre-retters setermeny kr 490 per person (drikke kan kjøpast på staden).

Bindande påmelding direkte til Mariann Totlund, tlf. 480 11 794.